細兄's profile【細ЫǿĢ】™PhotosBlogListsMore  |  Tools Help |
【細ЫǿĢ】™[____________________________________challenge everyone's soul____________________________________] |
|||||||||||||||||||||||||||
|
April 26 0804261655Biohazard
成個夢我都唔記得次序啦,大概分為4段...
1.break out!
2.escape
3.the beginning
4.survivor
1.
場景係沙田新城市廣場,係一個好悠閒既下午,當時商場冇咩人行,比平時假日少得多,
我應該係收到一個電話,有人話我知下面巴士站(去過新城市廣場既人都知下面有個巴士總站)有大件事發生,
我即刻跑去扶手電梯落去睇下咩事啦,我見到已經有人開始驚慌咁逃難,當我落到既時候,
剛好就有只喪屍係我前面,佢比我一直認知既喪屍有一樣分別,就係佢地擁有非常嚇人且巨大尖銳既獠牙!
佢地張開口,足足有一個正常人類既口三倍咁大,咬一啖,一啖,就即死!
好彩既係佢地暫時冇攻擊意識,不過我都因為太驚,立刻搭返隔離條扶手電梯上返商場,不過前面果只都係喪屍,
岩岩果只又跟我搭電梯,進退不難啊!!我一路用只腳頂住下面果只個頭,廢時佢行得咁近,終於上到商場,已經太遲了,
一片大混亂!
2.
我同女友及兩個朋友,坐船逃走,不過係走既時候我都唔小心比只喪屍咬左一細啖,受左少少感染,最後我地去到曼谷/菲律賓(唔記得)
係一間爛屋度休息,當時我既感染已經令我有少少喪屍化,呢個時候有几只喪屍係黑暗中想偷襲我地,不過我已經感應到佢地,
我撐起自己精疲力竭既身體向黑暗怒吼左几聲,果几隻喪屍就比我嚇走左,可能某程度我已經有同喪屍溝通既能力,好彩既係我冇完全喪屍化,
至少保留返人類應有既思想...
之後我地一行4人終於搵到一個地方落腳,我同女友終於獲得短暫既平靜,忍唔住親熱一返
而另外一個朋友,透過互聯網知道,香港已經淪陷近半,不過我地作出一個決定,返香港!(唔知點解...)
3.
呢一部份算係2.5,係逃難既中間引入既一段故事,呢1part係解釋返點解會有喪屍襲地球。
因為係唔知第几几次世界大戰,有一艘武艦(總之係軍用既船啦),遭敵軍突襲沉沒左,直至近呢几個月有人撈返只艦出黎,
為左懲罰無知既地球人,喪屍因此爆發,並唔係船入面有令到人變成喪屍既病毒,喪屍滅絕人類既原因係唔想佢地得到/知道艦入面既野!
所以我假設係有個組織利用喪屍去阻止人類得到一種足以改變世界既力量,不過個組織都估計唔到喪屍擺脫佢地既控制,
以滅絕人類既方式去達到目的。
4.
其實呢部份既故事已經跟喪屍無關,但係又接住劇情發展,咁我就當係人類贏左喪屍之後既生活
主要係我同百几人玩緊1d類似棒球既運動,類似係因為唔用棒球,而係用啤牌,不過玩既方式同棒球一樣...(都唔知玩咩)
p.s我見到陳法拉,不過佢企左係度唔知等緊乜,同佢傾左矽兩句我就走左
April 11 0804110815Empty.....
又好耐冇寫space啦,呢排因為入手左隻 無雙大蛇 魔王再臨 基本上半日都係打緊ps2
我覺得已經冇之前咁熱情去玩,呢個系列我已經玩左五年啦....雖然一路都有好多新野玩,
不過都係"同一個調調"而家打機真係為左消磨時間,冇左年少輕狂果份沉迷,唉...老左tim
以上心情只對應在家用游戲平台而已XD 哈哈
若果我部電腦能夠玩得上時下所有電腦game（包括網游）
1日24小時我依然係唔夠用架~最好有48小時....不好不好
若果我可以控制時間,我想1日可以打爆1隻game,hahahahaaa
既可以絕對體驗游戲既樂趣,又唔會太浪費時間,打一日休息一日
仲正過做消防員
我早排有個奢想,就係想40歲退休,打機打到壽終正寢~hahahaa
不過我諗冇未搵夠1億都唔駛旨意...因為我都係一個購物狂....
呢排有發左好多夢,不過都唔係好記得,斷斷續續咁,又冇咩特別,所以唔寫啦
April 01 0804011904Fly Me to Polaris
前日我發左個好慘既夢...
故事開始,我女友因為有左bb所以住左係醫院,等生
(間醫院應該係香港既,因為入面d設備都几high class)
咁我同佢屋企人,就日日去醫院探佢啦,我仲記得同佢爸爸一齊去提款機提款,
現實中既提款卡係打直插入去架嘛,夢入面果d係打斜隊入去的...好奇怪
如是者過左几日,有一日我係醫院出面個草地度行下,
佢爸爸突然之間打黎,話我女友生得啦!
咁我梗係一支箭咁沖返去醫院啦,途中係醫院既大門口見到有一堆人圍觀d野
聽人講好似係跳樓,我當然唔理咁多,當我搵到女友屋企人既時候,
奇怪既事情就發生左啦! 佢地全部都唔理我,我好似癮左形咁,我聲嘶力竭咁叫佢地,
佢地發覺好似有野叫緊佢地咁,不過好似幻覺咁
當我著急緊既時候,剛剛跳樓果個人比人推左入黎,我驟眼一望,那個人竟然係我自己!?
然後我記起,我剛剛係醫院同人爭執,比人推左落樓!!
不過我知道我仲未死,只係重傷,但足以令靈魂出竅
過左一陣,我女友終於生左啦,生左個女呀,我終於做左dad啦!
但由於生仔用左好多體力,所以我女友仲未醒,咁我就以靈魂既形式睇住佢,
仲間唔中係醫院蹓躂一下
(我去過一間生仔房,同普通病房一樣,不過每張床有兩塊木板隔開,行多几步見有人生緊仔,我就走左)
過多一段時間(夢係冇時間觀念既,所以我都唔知過左几耐)我女友終於醒啦!
而我因為救得返,個靈魂返返肉體,仲好奇蹟可以行tim!
我第一時間去睇我女友,我女友見到我第一句講既野係我絕對估計唔到!
「你係邊個呀?」
咪玩啦~生仔生懵左呀妳? --- 我仲串佢
不過我從我女友好茫然既眼神中發現 --- 佢真係唔識我!!
咁我當然奇怪啦,想問佢屋企人,點知又係叫極都冇反應!
但係我明明已經返返肉體,生勾勾咁企左係度啦,我突然醒覺,
因為我armarm曾經靈魂出竅,而且肉體亦受過重傷,令到我現在既 存在感近乎零 。
我係存在,但別人難以發現既意思,就好似一個人企係你面前,但係你眼大睇過籠既情況!
而且有要去感覺我既存在,因為我嘗試係咁叫佢地,叫左一陣佢地先聽到同發現到我。
過左一排,呢個情況有所改善,d人開始見到聽到我,但係最大問題係我女友,佢依然係唔識我!
無論我同佢講几多我同佢以前既野,佢依然都係完全冇反應,記唔起,除左我,佢所有記憶都冇問題
即係我從我女友記憶中完全刪除左咁
之後我有日去搵佢,知道佢出左院,去佢學校搵佢(佢課室就係佢病房隔離,夢就係咁奇怪)
見到佢既時候,我已經覺得佢變左第2個人...我就知道已經冇得翻轉頭...
不過
我仲有個女,個女係唯一一個能夠同我正常溝通既人(低存在感既問題一直存在,時好時壞)
時間一過就過左十几年,果女已經大個嘛
有次同佢搭火車(哈利波波果d長途火車)架車有好多靈異事件發生
最後我同個女殺左個巫婆,然後我係好阻止個女做一個決定/一件事情,
因為我知道會重蹈我同佢媽媽覆轍,然後個巫婆既靈魂出現左,
同我講,「你終於知道問題既徵結係邊度啦...」
之後就一直時光倒流....到我醒左! 雖然我唔知時光倒流到邊度,但係我知道所有野都會打回原形!
後記:
雖然我真係唔知個夢講咩,但係我醒左第1件事就係攬住女友,因為我真係好驚佢會唔記得我!
同埋我覺得個情節係好似n年前pg同任賢齊果套「星願」
不過我比任賢齊佢地好彩,至少我冇死,同埋可以一切打回原形,
只不過係時間耐d
March 27 0803271724oh my money!!!!!!!!
尋晚落街食飯唔記得帶鎖匙,就搵屋主啦,點知佢竟然話隔離房有我地鎖匙喎!
佢話上次整壞熱水爐,但係我地果陣唔係度,所以將d鎖匙擺低係隔離房!
雖然覺得佢有d過份,不過都冇辦法,拎左隔離房既手提電話,send個sms比佢,
我:你好,我是住在你隔離房的,屋主說你有我房的鎖匙,請問你大概什么時候回來?
他:不好意思,我在四川 (我吐血)
我:那沒辦法了,不好意思了打攪你了
他:我不好意思才對,對不起啊
突然覺得隔離房都應該係個好人
 (佢個名叫羅西,不過唔知係先生定小姐,因為英文叫Lucy,笑XD)咁拎唔到鎖匙...唯有叫人開鎖啦...開左90人仔呀!
心都痛埋T__T....
今次真係個好大既教訓....我發誓以後都唔會唔記得帶鎖匙就"砰門"....阿門
------------------------------------------------------------------------------------------------------------------
最近勁like解謎,全因玩左 雷頓教授
有ndsl既朋友不妨玩下,入面有好多類謎題,有d好仆街,有d好考轉數
繼任天狗之後,第2只愛上既ndsl game(8/10)
------------------------------------------------------------------------------------------------------------------
低能貓貓的玉照
 佢到底係男是女,我都仲未搞清楚呢...邊個識分男女請指教一下,我對住呢只也母型真係冇野講...
------------------------------------------------------------------------------------------------------------------
March 26 080326340Dictionary of The Weapon
終於買到想買既書啦!
買既方法亦都係我既第一次 - 網上購物。
我訂左4本書:
1.武器事典
2.惡魔事典
3.西洋神名事典
4.幻獸.龍事典
冇錯,4本野都係同一個系列既,因為我對呢d野好有興趣,
而且對我夢想都好有實際用途,雖然好遙遠,但係只要肯行,目標都會愈來愈近
仲有其餘3本聽日都應該收得到~呵呵
呢4本野我原先係香港大眾書局見到先既,果陣已經好想買啦
不過每本都要$100以上,我仲要買4本,要成400几蚊
所以我諗住返上廣州先買,點知天河間書城,得個大字,几本書都冇
原本都打算放棄,之後便便上網幫我搵到,仲多過香港tim,
所以真係要多謝便便~
唔好以為上網訂就會貴,我訂一本都係20几蚊咋,4本100都唔駛!
(買滿100好似不收配送費,不來好似收5蚊,海外就唔清楚)
送貨又唔會耐(我尋日訂,今日就收到,不過視乎情況地區同數量)品質又ok(唔係次貨)
大家有想搵既書,又唔想去行書局慢慢搵,又唔介意中文書係簡體字既話,
可以上呢個網搵下：
個網有其他產品，不過我淨係買書
---------------------------------------------------------------------------------------------------------------
同場加映：低能貓貓之咪影啦！
---------------------------------------------------------------------------------------------------------------
同便便去食既牛腩真豬粉&蒸排骨飯
地址: 暨大西門間M記樓上
價錢: 中,點心几蚊至廿蚊不等
(我同便便兩個叫左3個點心,兩個面飯+兩個茶位都係40人仔)
--------------------------------------------------------------------------------------------------------------- |
|
||||||||||||||||||||||||||
|
|
